Алматыда су тұтынушыларын ауқымды тексеру басталды: автомойкалар мен қоғамдық тамақтану орындары ерекше бақылауда
Алматыда суық сумен жабдықтау және кәріз жүйесін тұтынушыларға қатысты ауқымды тексеру басталды. Ерекше бақылауға автомойкалар, моншалар, қоғамдық тамақтану орындары және кәсіпорындар алынды. Іс-шаралар бұзушылықтарды анықтауға және су шығынын азайтуға бағытталған.
Алматының энергетика және сумен жабдықтау басқармасының мәліметінше, тексерулердің белсенді кезеңі қалалық түгендеу аясында өтіп жатыр. Негізгі мақсат — су пайдалануды ретке келтіру және ресурстардың ашық есебін қамтамасыз ету.
Нені тексереді
ГКП на ПВХ «Алматы Су» мамандары абоненттердің су беру және су бұру қағидаларын сақтауын тексеруде. Негізгі назарда:
- заңсыз қосылулар;
- есептегіш құралдарының жұмысына араласу;
- суды нақты тұтынуды төмендетіп көрсету.
Сонымен қатар инженерлік желілердің техникалық жағдайы бағаланады. Тексеруді ыңғайлы жүргізу үшін қала аумақтарға бөлініп, сол жерлерде мобильді топтар жұмыс істеп жатыр.
Қай нысандар тәуекел аймағында
Суды көп тұтынатын ірі абоненттерге ерекше көңіл бөлінуде. Олардың қатарында автомойкалар, моншалар, мейрамханалар, сауда орталықтары және өнеркәсіп нысандары бар.
Мұндай ұйымдар үшін суды қайта пайдалану жүйелері мен жергілікті тазарту құрылыстары міндетті.
Бұзушылықтар және қолданылатын шаралар
Алғашқы апталардың қорытындысы бойынша 100-ден астам бұзушылық анықталған. Оның ішінде:
- келісімшартсыз су пайдалану;
- есепке алу құралдарына араласу;
- тазартылмаған ағынды суларды төгу;
- қоғамдық тамақтану орындарында майұстағыштардың болмауы.
Бұзушылық жасағандарға заңнама аясында шаралар қолданылады — тұтынуды қайта есептеуден бастап, қызметті шектеу немесе толық тоқтатуға дейін.
Жыл басынан бері 29 автомойка алғаш рет айналымдық (обороттық) сумен жабдықтау жүйесін орнатқан. Тағы 78 нысан төмендетілген тұрмыстық тарифтің орнына коммерциялық тарифтерге ауыстырылған.
Бұдан бөлек, инженерлік желілерге өз бетінше қосылудың 20-дан астам жағдайы анықталған.
Еске салайық, 2025 жылғы шілдеден бастап Қазақстанда жаңартылған Су кодексі қолданыста, ол табиғи ресурстарды анағұрлым ұтымды пайдалануды көздейді. Негізгі бағыттардың бірі — суды ең көп көлемде тұтынатын нысандармен жұмыс. Бұл тізімге автомойкалар да кірді: жаңа талаптарға сәйкес, олар біртіндеп айналымдық сумен жабдықтау жүйесіне көшуі тиіс.
