АҚШ Иранға қарсы бомбалаулар мен өзге әскери соққыларды екі аптаға тоқтатуды шешті
🇮🇷🇺🇸 АҚШ Иранға қарсы бомбалаулар мен басқа да әскери соққыларды екі аптаға тоқтатуды шешті. Бұл туралы АҚШ президенті Дональд Трамп Truth Social әлеуметтік желісіндегі жазбасында мәлімдеді.
Трамптың айтуынша, шешім Пәкістанмен консультациялардан кейін қабылданған. Шарттардың бірі ретінде осы мерзім ішінде Ормуз бұғазы арқылы кемелердің еркін өтуі көрсетілген.
Трамп АҚШ барлық негізгі әскери міндеттерді орындап қана қоймай, олардан да асып түскенін айтты. Сондай-ақ Вашингтон Тегеранмен ықтимал ұзақ мерзімді бейбіт келісімді талқылап жатқанын жеткізді. Америкалық тараптың мәлімдеуінше, Иран келіссөздерге негіз бола алатын 10 тармақтан тұратын жоспар ұсынған.
АҚШ-тың бір шенеунігі Иранға жасалған соққылардың тоқтатылғанын растады. Сонымен қатар Израильдің де екі апталық үзіліске келіскені айтылды.
Иран өз кезегінде бітімге дайын екенін мәлімдеді. Fars мемлекеттік агенттігінің хабарлауынша, Тегеран болып жатқан жағдайды өзінің «жеңісі» деп санайды және ұсынылған жоспардың орындалуын талап етеді. Бұл жоспар санкцияларды алып тастауды және Ормуз бұғазы арқылы кемелердің өтуі үшін төлем жасауды қамтиды.
