АҚШ Таяу Шығысқа үшінші авианосецін жіберді
АҚШ Таяу Шығысқа үшінші авианосецін жіберді. Бұл жолы әңгіме USS George H.W. Bush авианосеці туралы.
АҚШ Әскери-теңіз күштерінің баспасөз қызметінің мәліметінше, авианосец 31 наурызда Вирджиния штатындағы Норфолк әскери-теңіз базасынан шыққан. Кеме өңірге әскери кемелердің сүйемелдеуімен бағыт алған. Ол межелі жеріне бірнеше аптадан кейін жетуі мүмкін.
Екі шенеунік USS George H.W. Bush авианосеці USS Abraham Lincoln және USS Gerald R. Ford авианосецтік соққы топтарына қосылатынын айтқан. Қазір USS Abraham Lincoln Араб теңізінде, ал USS Gerald R. Ford Хорватия портында жөндеуде тұр.
Үшінші авианосецтің жіберілуі АҚШ күштерінің өңірдегі қатысуын күшейтуі және АҚШ президенті Дональд Трамптың Иранға қатысты одан арғы әскери қадамдарды қарастыруы аясында болып отыр.
USS Abraham Lincoln Таяу Шығысқа 2026 жылдың қаңтар айының соңында келген. Ақпан айының ортасында өңірге екінші авианосецтік топты жіберу туралы белгілі болды. 31 наурызда Таяу Шығысқа АҚШ-тың 82-әуе-десант дивизиясының әскери қызметшілері келе бастағаны хабарланды. Бұдан бірнеше күн бұрын АҚШ қарулы күштерінің орталық қолбасшылығы Tripoli десант кемесінің 3,5 мың теңізші мен теңіз жаяу әскерін алып келгенін мәлімдеген.
Бұған дейін америкалық шенеуніктерге сілтеме жасалған ақпаратта Пентагон Иранға қарсы бірнеше аптаға немесе «бір-екі айға» созылатын құрлық операциясына дайындалып жатқаны айтылған. Сонымен бірге Трамптың операция жоспарларының қандай да бірін қабылдайтыны анық емес екені көрсетілген. Сондай-ақ ықтимал құрлықтағы науқан толық ауқымды басып кіру болмайтыны, оның құрамына жаяу әскер мен арнайы операциялар күштерінің рейдтері кіруі мүмкін екені атап өтілген.
