TikTok-тағы жарияланым екі көршіні сотқа жеткізді: Шу аудандық соты істі татуласуға байланысты тоқтатты
Жамбыл облысы Шу қаласында TikTok әлеуметтік желісіндегі жарияланым екі көршінің сотқа жүгінуіне себеп болды. Істі Жамбыл облысы Шу аудандық соты қарады.
Сотта айтылғандай, Шу қаласының тұрғыны TikTok арқылы көршісінің ар-намысы мен қадір-қасиетіне нұқсан келтіретін мәліметтер таратқан. Жарияланымда жәбірленушінің беделіне зиян келтіруі мүмкін көрінеу жалған ақпарат болғаны көрсетілді. Іс әлеуметтік желілерді пайдалану арқылы жасалған жала жабу фактісі бойынша қаралды.
Аталған баптың санкциясы жеке тұлғаға 180 АЕК мөлшерінде айыппұл салуды (2026 жылы 778 500 теңге) немесе 20 тәулікке әкімшілік қамауға алуды көздейді.
Соттың мәліметінше, азаматша А.-ның кінәсі тараптардың түсініктемелерімен, полиция материалдарымен және жарияланған мәліметтердің ар-намыс пен қадір-қасиетке нұқсан келтіретінін көрсеткен сараптама қорытындысымен расталған. Сот отырысында А. кінәсін ішінара мойындап, жәбірленушіден кешірім сұрағанын және бұдан былай мұндай мәлімет таратпайтынын айтқан.
Жәбірленуші де істің мән-жайын растады, азаматша А.-мен татуласқанын мәлімдеп, іс жүргізуді тоқтатуды сұрады.
Нәтижесінде сот істі татуласуға байланысты тоқтатуға болады деген қорытындыға келді. Сот қаулысымен А. әкімшілік жауапкершіліктен босатылып, іс бойынша өндіріс тоқтатылды. Қаулы заңды күшіне енді.
Бұған дейін Instagram-дағы жарияланым үшін қазақстандық әйелге 86 500 теңге айыппұл салынғаны хабарланған. Әйел әлеуметтік желіде орналастырған жалған ақпарат үшін айыппұлға тартылған.
Сондай-ақ: «Коррупционер и сплетник» - скандал в школе дошёл до суда
