Қазақстанның авиация саласында алдағы 15 жылда ІТ мен жасанды интеллектке байланысты жаңа мамандықтар пайда болады
Алдағы 15 жылда Қазақстанның авиация саласында жаңа мамандықтар пайда болады. Олардың басым бөлігі ақпараттық технологиялармен және жасанды интеллектті енгізумен байланысты.
Жаңа әрі ерекше мамандықтардың қатарында, мысалы, әуе қозғалысын жобалаушы, интеллектуалды диспетчерлік жүйелерді әзірлеуші, сутегі қауіпсіздігі инженері аталды.
Жаңа кәсіптер атласы жуырда Алматыда таныстырылды. Оны әзірлеу бастамасы Халықаралық азаматтық авиация ұйымына тиесілі.
Тізімде қолмен деректерді өңдеуге және автоматтандыру деңгейі төмен түрлі қызметтердің жұмысына қатысты мамандықтардың іс жүзінде жоқ екені атап өтілді.
Қазақстан Республикасы Көлік министрлігі Азаматтық авиация комитетінің төрағасы Салтанат Томпиева Халықаралық азаматтық авиация ұйымының бағалауына сәйкес, 2040 жылға қарай жолаушылар ағыны үш есе өсетінін айтты. Оның сөзінше, Қазақстанда да жыл сайын жолаушылар ағыны мен жүк ағыны 5–10 пайызға артып келеді.
Томпиева негізгі мақсаттың авиацияға жаңа буынды ынталандырып, тарту екенін, әсіресе әйелдерді көбірек тарту маңызды екенін атап өтті. Оның айтуынша, азаматтық авиацияда әйелдердің үлесі қазірдің өзінде шамамен 40 пайызды құрайды.
Жаңа буын кадрларын даярлау Қазақстанның Азаматтық авиация академиясы базасында жүргізіледі.
