Сенатор Марат Қожаев көшедегі жарысқа қатысатын жүргізушілерге жазаны қатаңдатуды ұсынды
Қазақстан қалаларының көшелері мен даңғылдары барған сайын көшедегі жарыстар өтетін орынға айналып келеді. Бұрынғы ішкі істер вице-министрі, сенатор Марат Қожаев мұндай жүргізушілерге қатысты шараларды қатаңдату қажет екенін айтып, жүргізуші куәлігінен айыру және арнайы тексерістер енгізу мүмкіндігін де көтерді.
«Ойын ережесін өзгерту керек»
Марат Қожаев полиция көшедегі жарыс ұйымдастыратын жүргізушілерді назардан тыс қалдырмайтынын, алайда оның айтуынша, «күш әрдайым жете бермейтінін» атап өтті.
Ол әрбір жүргізушіні жеке бақылауға қою мүмкін емес екенін айтып, бұл мәселені шешу үшін «ойын ережесін өзгерту» керектігін жеткізді. Сенатордың пікірінше, мұндай құқық бұзушыларға қатысты талаптарды күшейтіп, заңды қатаңдату қажет.
Қожаев Қазақстандағы жүргізушілердің басым бөлігі — шамамен 95 пайызы — ережені сақтайтынын, бірақ 5–6 пайыз шамасындағы «шағын топ» үнемі бұзатынын айтты. Оның сөзінше, кейбірі жүздеген құқық бұзушылық жасайды. Сенатор мұндай жүргізушілерге қатысты талаптарды күшейтіп, оларды жүйелі түрде бұзатындар тізіміне енгізуді ұсынды.
Оның айтуынша, алдымен «артықшылықтарды» алып тастау керек, соның ішінде айыппұл төлеудегі 50 пайыздық жеңілдікті қолданбау мәселесі бар. Сондай-ақ ол жол қозғалысы ережесін сақтауға мәжбүрлеудің бір жолы ретінде жүргізуші куәлігін алып қоюды және қайта тапсыруға жіберуді атады. Қожаев Германияда мұндай жүргізушілер үшін арнайы тест бар екенін айтып, оны «идиотентест» немесе «идиотқа тест» деп атады және мұндай шараға дейін баруға болатынын жеткізді.
Контекст
Бүгін Алматыдағы Әл-Фараби даңғылында кезекті өліммен аяқталған жол-көлік оқиғасы болды: жолдан өтіп бара жатқан әйел көліктің астында қалып, қаза тапты.
21 наурызға қараған түні Әл-Фараби даңғылында Zeekr электрокары қарсы бағыттағы жолаққа шығып кетіп, шығыс бағытта келе жатқан Mercedes көлігін соққан. Mercedes жүргізушісі мен екі жолаушысы (қыздар, біреуі 22, екіншісі 20 жаста) оқиға орнында көз жұмды. Zeekr жүргізушісі тірі қалып, жарақатпен ауруханаға жеткізілді.
Бұған дейін Алматы полициясы қалада қауіпті жүргізуді қоса алғанда, жол қозғалысы ережелерін өрескел бұзу фактілерінің артқанын хабарлаған. Жағдайды тұрақтандыру үшін полиция жолдардағы бақылауды күшейтіп, бірқатар рейд өткізген. Сол рейдтердің бірінде Әл-Фараби даңғылында көлігін сағатына 250 шақырымға дейін үдеткен жүргізуші анықталған. Оның жеке басы анықталып, сот шешімімен құқық бұзушы 10 тәулікке қамауға алынған.
