Никита Михайлис пен Валерий Орехов Қазақстан құрамасының әлем чемпионатын КХЛ плей-оффына байланысты өткізіп алуы мүмкін
Қазақстан құрамасының хоккейден көшбасшылары — магнитогорскілік «Металлург» клубының шабуылшысы Никита Михайлис пен қорғаушысы Валерий Орехов — Континенталдық хоккей лигасындағы (КХЛ) плей-офф ойындарына байланысты хоккейден әлем чемпионатын өткізіп алуы мүмкін.
Матчтан кейінгі баспасөз мәслихатында «Металлургтің» бас бапкері Андрей Разин әзіл түрінде клубтың Михайлис пен Ореховты құрама матчтарына жіберуге ниетті емес екенін айтты.
«Оларды қалай жібереміз, егер біз плей-оффта ойнайтын болсақ? Әлем чемпионатын кейінге шегере берсін», — деді маман.
Плей-оффтың бірінші кезеңінде «Металлург» «Сибирь» командасымен кездеседі. Серия 24 наурызда басталып, командалардың біреуі төрт жеңіске жеткенге дейін жалғасады.
Егер «Металлург» конференция финалына дейін жетсе, лигадағы Қазақстанның жалғыз өкілдері саналатын Михайлис пен Орехов, ықтимал түрде, Қазақстан құрамасына әлем чемпионатында көмектесе алмайды, өйткені КХЛ плей-оффы мамырдың соңына дейін созылады.
Ал хоккейден әлем чемпионатына келсек, өткен жылы Қазақстан элиталық дивизионнан түсіп қалып, биыл бірінші дивизионда ойнайды.
Турнир 2–8 мамыр аралығында Польшаның Сосновец қаласында өтеді. Қазақстан құрамасының қарсыластары: Польша, Франция, Украина, Жапония және Литва. Элиталық дивизионға екі үздік команда жолдама алады.
