Қырғызстанда балаларға ине салынған кәмпит таратты деген күдікпен ер адам ұсталды
Қырғызстанда балаларға ине салынған кәмпит таратты деген күдікпен ер адам ұсталды.
Оқиға 28 наурыз күні кешке Бішкектегі «Ак-Ордо» тұрғын алабында болған. Ленин аудандық ІІБ баспасөз қызметінің мәліметінше, жергілікті тұрғын әйел арызданған. Әйелдің айтуынша, оның 11 жастағы қызы және басқа да балалар белгісіз ер адамнан тәтті алған. Кейін кәмпиттердің ішінен иненің бөлшектері табылған.
Аталған дерек бойынша Ленин аудандық ІІБ-нің тергеу қызметі қылмыстық іс қозғады. Барлық мән-жайды анықтау үшін қажетті сараптамалар тағайындалды.
Күдікті ұсталды
Жедел іс-шаралар барысында милиция қызметкерлері болжамды күдіктінің жеке басын анықтаған. Ол Н.Д. деген инициалдармен көрсетілген ер адам болып шықты. Ол ұсталып, ҚІІББ-ның уақытша ұстау изоляторына қамалды.
Күдіктінің тұрғылықты жерін тінту кезінде кәмпиттер және тергеу үшін маңызы болуы мүмкін өзге де заттай дәлелдемелер тәркіленді.
Тұрғындарға үндеу
Құқық қорғау органдары ата-аналарды балалармен түсіндіру әңгімелерін жүргізуге шақырды. Сондай-ақ бейтаныс адамдардан тамақ және кез келген заттарды алуға болмайтыны ескертілді.
