Михаил Кайзер жағажай футболынан әлемнің үздік ойыншысы сыйлығының шорт-листіне енді
Қазақстандық футболшы Михаил Кайзер Дүниежүзілік жағажай футболы федерациясының нұсқасы бойынша планетаның үздік ойыншысы сыйлығының шорт-листіне енді.
Жыл сайын өтетін Beach Soccer Stars сыйлығы әлемнің үздік футболшысы атағына үміткерлер тізімін жариялады. Шорт-листке 100 ойыншы кірді, олардың қатарында павлодарлық «Армана» клубының және Қазақстан құрамасының ойыншысы Михаил Кайзер де бар.
«Мен әлемнің үздік ойыншыларының қатарына енгенімді білгенде қатты таңғалдым және бір мезетте шексіз қуандым», — деді Михаил.
Оның айтуынша, ол 21 жаста, ал жағажай футболына өзін арнағанына соңғы төрт жыл ғана болған.
«Футболды 7 жасымда ойнай бастадым — содан бері доп менің өмірімнің бір бөлігіне айналды. 4 жыл бойы жағажай футболына өзімді арнап келемін, бірақ көгалда да ойнауды жалғастырып жүрмін. Осы уақыт ішінде, өкінішке қарай, менде бірде-бір рет кәсіби келісімшарт болған жоқ. Бірақ бұл өз ісіңді шын сүйіп, көп еңбек етіп, өзіңе сенсең, кез келген шекараны еңсеруге болатынын тағы бір дәлелдейді», — деді ол.
Бұған дейін Михаил Кайзер 2025 жылғы Еуролиганың (B дивизионы) ең құнды ойыншысы (MVP) атанған. Турнирде ол 7 матч өткізіп, 7 гол соғып, Қазақстан құрамасының ең нәтижелі ойыншысы болды. Қазақстан құрамасы бұл жарыста жоғары дивизионға көтерілді.
Әлемнің үздік ойыншысы атағына дауыс беру ұлттық құрамалардың бас бапкерлері мен капитандары арасында өтеді.
Бұған дейін Қазақстаннан шыққан 15 жастағы футболшы Карим Мендиканов каталониялық «Барселонамен» келісімшартқа қол қойып, командаға келесі маусымда қосылатыны хабарланған.
Сондай-ақ Халықаралық футбол қауымдастықтары федерациясы (ФИФА) Қазақстан құрамасының футболдағы рейтингін үйде өткен FIFA Series турниріндегі жеңістен кейін көтерді.
