Президент Архиві Қазақстанның мемлекеттік билік жүйесі туралы анықтамалықты таныстырды
Президент Архиві Қазақстанның мемлекеттік билік жүйесі туралы анықтамалықты таныстырды. Басылымға мемлекеттік органдар жөніндегі мәліметтер енгізілген: олардың құрылуы, функциялары, құрылымы, өкілеттіктері, сондай-ақ қайта ұйымдастырылуы немесе таратылуы туралы деректер қамтылған.
Кітап тәуелсіздіктің алғашқы жылдарынан бастап қазіргі институционалдық реформаларға дейінгі кезеңді қамтитын құжаттық хроника ретінде ұсынылған. Анықтамалық 1991 жылдан 2024 жылға дейінгі уақыт аралығын қамтиды.
Анықтамалықтың дайындалуына архивистер мен ғалымдар үш жылдан астам уақыт жұмыс істеген. Бұл — Президент Архиві әзірлеген серияның төртінші шығарылымы. Бұған дейінгі басылымдар 2004, 2007 және 2012 жылдары жарық көрген. Жаңа кітап осы шығарылымдардың материалдарын біріктіреді.
Президент Архиві РК директорының орынбасары Қайрат Алимгазиновтың айтуынша, анықтамалықтағы ақпарат архив құжаттарына сүйеніп, мұқият тексерілген. Оның сөзінше, бұл басылым мемлекеттік органдар тарихын, олардың өзара іс-қимыл жүйесін, белгілі бір органның қай жылдары және қандай нормативтік-құқықтық актімен құрылғанын, қандай функция атқарғанын, кімге бағынышты болғанын және қалай өзара әрекеттескенін зерттеуге мүмкіндік береді. Ол мұндай анықтамалықтарды шығару тәжірибесін Президент Архивінен басқа жерде кездестірмегенін атап өтті.
