Щучинскіде қазылған құдықтан сасық сұйықтық аққаны туралы видео тарады: экология департаменті пікір білдірді
Щучинск қаласында бұрын жылқы ашық құдыққа құлаған орын қайта қазылғаны хабарланды. Желіде тараған видеоматериалдарда құдықтың ашылғаны, одан ластанған су ағып жатқаны, қан белгілері бар сұйықтықтың байқалғаны және өткір жағымсыз иістің тарағаны көрсетілген.
Instagram-тағы жазбада бұл жағдай құдық ішінде биологиялық қалдықтардың болуы мүмкін екенін білдіретіні айтылған. Онда, егер құдықта жануардың қалдықтары болған жағдайда, толық тазалау мен дезинфекция жүргізілмесе, оның инфекция ошағына айналып, санитарлық-эпидемиологиялық қауіпсіздікке қатер төндіруі, сондай-ақ топырақ пен судың ластану қаупін күшейтуі мүмкін екені көрсетілген.
Сондай-ақ алдын ала мәлімет бойынша, жұмыстар бұзушылықтармен жүргізілген: санитарлық өңдеу жасалмаған, қоршау орнатылмаған, тұрғындарға ескерту берілмеген.
Департамент не дейді Ақмола облысының экология департаменті жағдайға қатысты түсініктеме беріп, Щучинскіде өлген жылқыны тиісті емес түрде көму және кәдеге жарату фактісін растады.
Департаменттің мәліметінше, жануар өлексесін техникалық құдыққа көміп, үстін топырақпен жабу — Экологиялық кодекс пен «Биологиялық қалдықтарды кәдеге жарату қағидаларын» өрескел бұзу болып саналады. Ведомство өкілдері су айдындарының маңында топыраққа тікелей көмуге қатаң тыйым салынатынын, мұндай әрекеттер судың ластануына және инфекциялардың таралуына тікелей қауіп төндіретінін атап өтті.
Сонымен бірге, биологиялық қалдықтарды кәдеге жарату, сондай-ақ ыдырау аймағындағы судан сынама алу және талдау мәселелері жергілікті әкімдіктердің, санитарлық-эпидемиологиялық қызметтің және ветеринарлық қызметтердің құзыретіне жататыны нақтыланды.
Департаментте аталған бұзушылықтар үшін Әкімшілік құқық бұзушылық туралы кодекстің 344-бабына сәйкес әкімшілік жауапкершілік қарастырылғанын айтып, материалдарды алу үшін сұрау салу жіберілгенін хабарлады. Сондай-ақ полиция тарапынан мәліметтер ұсынылатыны күтілетіні айтылды.
Қалалық әкімдікте бұл жарияланым бойынша тиісті тексерулер жүргізіліп жатқанын, қорытындысы бойынша қолданыстағы заңнама аясында қажетті шаралар қабылданатынын мәлімдеді.
