Сэм Альтманның Сан-Францискодағы вилласына шабуыл жасалды
Сан-Францискода OpenAI компаниясының тең құрылтайшысы әрі бас директоры Сэм Альтманның вилласына шабуыл жасалды. 20 жастағы ер адам үйге жанғыш қоспасы бар бөтелке лақтырып, соның салдарынан қақпа өртенген. Оқиға кезінде адамдар зардап шеккен жоқ.
Жергілікті полицияның мәліметінше, шабуыл жасаған адам оқиға орнынан қашып кеткенімен, кейінірек ұсталған. Сондай-ақ ол Сан-Францискодағы компанияның бас кеңсесін өртеймін деп қорқытқан.
San Francisco Chronicle мәліметіне сәйкес, күдікті Алехандро Даниэль Морено-Гама есімді азамат қамауға алынды. Полиция оның әрекетінің нақты мотиві әзірге белгісіз екенін атап өтті.
Соңғы уақытта жасанды интеллект негізіндегі ChatGPT чат-ботын әзірлеуші ретінде танымал OpenAI компаниясы мен оның басшысы жасанды интеллектке қарсы наразылық білдірушілердің нысанасына айналғаны да айтылды. Олар бұл технологияны адамзатқа қауіп төндіреді деп санайды.
Шабуылдан кейін Сэм Альтман өз үйіне жасалған әрекетке жауап ретінде күйеуі мен ұлының фотосын және жазба жариялаған.
"Мен технологияға қарсы көңіл күйді түсінемін, әрі олардың әрдайым бәріне бірдей пайда әкелмейтіні анық, — деп жазды ол блогында. — Мұны талқылағанда, риторика мен әрекеттердің қызуын төмендетіп, тура және ауыспалы мағынада да "жарылыстар" аз болуына ұмтылуымыз керек".
Альтман жасанды интеллектке қатысты сынның орынды екенін атап өтіп, сонымен бірге OpenAI-дегі жұмысына мақтанатынын айтты.
